1Ki 21 | NdeIBE | STEP | Kwathi ngemva kwesikhathi esithile kwaba lesenzo esithile ngesivini sikaNabothi umJezereli. Isivini leso sasiseJezereli, phansi kwesigodlo sika-Ahabi inkosi yaseSamariya.

1 Kings 21

Isivini sikaNabothi

1 Kwathi ngemva kwesikhathi esithile kwaba lesenzo esithile ngesivini sikaNabothi umJezereli. Isivini leso sasiseJezereli, phansi kwesigodlo sika-Ahabi inkosi yaseSamariya.

2 U-Ahabi wathi kuNabothi, “Kahle mina ngilime imibhida yami esivinini sakho, njengoba siphansi kwesigodlo sami. Mina ngizakunika isivini esingcono, loba nxa uthanda, ngizakunika intengo ofisa ukusithengisa ngayo.”

3 Kodwa uNabothi wathi, “UJehova kangavumi ukuba ngikunike ilifa labobaba.”

4 Ngalokho u-Ahabi wabuyela ekhaya esineme njalo ethukuthele ngoba uNabothi umJezereli wayethe, “Angizukukunika ilifa labobaba.” UAhabi walala embhedeni esineme wala lokudla.

5 Umkakhe uJezebeli wangena endlini wambuza wathi, “Kungani usineme kangaka? Kungani usala ukudla?”

6 Yena wamphendula wathi, “Kungenxa yokuthi ngithe kuNabothi umJezereli, ‘Ngithengisela isivini sakho; loba nxa ufuna, ngikunike esinye isivini esikhundleni salesi.’ Kodwa ungiphendule wathi ‘Angizukukunika isivini sami.’ ”

7 UJezebeli umka-Ahabi wathi, “Lokhu yikho okwenzayo njengenkosi yako-Israyeli na? Vuka udle! Uchelese. Mina ngizakuzuzela isivini sikaNabothi umJezereli.”

8 UJezebeli wasebhala izincwadi ngebizo lika-Ahabi, wazidinda ngophawu luka-Ahabi, wazithumela kubadala lakuzo izikhulu ezazihlala loNabothi emzini wakibo.

9 Ezincwadini lezo waloba ukuthi: “Memezelani usuku lokuzila libe selibeka uNabothi esihlalweni esiqakathekileyo phakathi kwabantu. 10 Libe selihlalisa izigangi ezimbili maqondana laye lithi kazifakaze ngokuthi uthuke uNkulunkulu kanye lenkosi. Libe selimkhuphela phandle liyemkhanda ngamatshe limbulale.”

11 Ngakho abadala lezikhulu ababehlala emzini kaNabothi benza lokho ababekuthunywe nguJezebeli ngezincwadi ayebalobele zona. 12 Bamemezela isikhathi sokuzila bahlalisa uNabothi esihlalweni esiphakemeyo phambi kwabantu. 13 Kwasuka izigangi ezimbili zahlala phambi kwakhe zakhangelana laye zaqalisa ukwethesa uNabothi amacala, zisithi, “UNabothi uthuke uNkulunkulu kanye lenkosi.” Ngakho bamkhuphela ngaphandle komuzi bamkhanda ngamatshe bambulala. 14 Basebethumela ilizwi kuJezebeli besithi, “UNabothi ukhandwe ngamatshe njalo usefile.”

15 Masinyazana uJezebeli esezwe ukuthi uNabothi ukhandwe ngamatshe wabulawa, wathi ku-Ahabi, “Vuka uyethatha isivini sikaNabothi umJezereli sona lesiyana alileyo ukukuthengisela sona. Uvele kasekho, usefile.”

16 U-Ahabi uthe esizwa ukuthi uNabothi kasekho, wavuka wayathatha leso sivini sikaNabothi.

17 Ilizwi likaJehova leza ku-Elija umThishibi lisithi: 18 Yehla uyehlangabeza u-Ahabi inkosi yako-Israyeli obusa eSamariya. Usesivinini sikaNabothi, uye khona ukuze azithathele lesosivini. 19 Ufike uthi kuye, Nanku okutshiwo nguJehova: ‘Awubulalanga umuntu wathumba impahla yakhe na?’ Ubususithi kuyo, ‘Nanku okutshiwo nguJehova; Khonapho lapho izinja ezikhothele khona igazi likaNabothi, kukhonapho kanye lapho izinja ezizakhothela khona elakho – ye, elakho kanye!’ ”

20 U-Ahabi wathi ku-Elija, “Wo usungifumene, wena sitha sami!” U-Elija wamphendula wathi, “Yebo sengikufumene ngoba uzinikele ukwenza isono emehlweni kaJehova. 21 Ngizokwehlisela ukubhujiswa. Ngizabhubhisa izizukulwana zakho ngisuse sonke isilisa sokucina ku-Ahabi ko-Israyeli – loba yisigqili loba ngokhululekileyo. 22 Indlu yakho ngizayenza lokhu engakwenza ekaJerobhowami indodana kaNebathi lekaBhahasha indodana ka-Ahija, ngoba ungithukuthelisile wabangela ukuthi u-Israyeli enze isono.’

23 “Ngalokho uJehova uthi ngoJezebeli: ‘Izinja zizamdabudabula uJezebeli zimdlele emidulini yaseJezereli.’

24 “Izinja zizakudla bonke abangabaka-Ahabi abafela edolobheni, izinyoni zezulu zizakudla labo abazafela emaphandleni.”

25 (Akuzange kube lendoda eyayifanana lo-Ahabi yena owazinikela ukuthi adale isono phambi kukaJehova, ekhuthazwa ngumkakhe uJezebeli. 26 Waziphatha butshapha kakhulu elandela izithombe, njengama-Amori wona ayesuswe nguJehova phambi kuka-Israyeli.)

27 U-Ahabi wathi esizwa lawomazwi, wadabula izigqoko zakhe, wembatha amasaka wazila. Walala embethe amasaka wahamba ngokuthobeka.

28 Ngemva kwalokho ilizwi likaJehova lathi ku-Elija umThishibi: 29 “Ukubonile na ukuthi u-Ahabi usezithobe kanganani phambi kwami? Ngenxa yokuzithoba kwakhe, angiyikumehlisela lokhu kubhujiswa esaphila, kodwa ngizakwehlisela endlini yakhe ezinsukwini zendodana yakhe.”